Tashish shartnomasi majburiy va ixtiyoriy ravishda o‘zgartirilishi mumkin.

Tashish shartnomasi yo‘nalishning istalgan manzillarida, quyidagi hollarda majburiy ravishda o‘zgartiriladi:
yo‘lovchi band qilingan joyga tashuvchining aybi bilan tutash qatnovga kela olmaganida;
tashuvchi band qilingan joyni yo‘lovchiga berish imkoniyatiga ega bo‘lmaganida;
tashuvchi qatnovni bekor qilganida;
tashuvchi qatnovni parvozlar jadvaliga muvofiq ravishda bajara olmaganida;
tashuvchi yo‘lovchi uchun to‘xtash va qo‘nish manzillarida to‘xtashni bajara olmaganda.
Tashishning majburiy ravishda o‘zgartirilishi tashishning boshlanish vaqti va (yoki) muddati, tashuvchining, tashish yo‘nalishining, xizmat ko‘rsatish toifasining o‘zgartirilishiga sabab bo‘lishi mumkin.

Tashish shartnomasi majburiy ravishda o‘zgartirilganda, tashuvchi quyidagilarni bajarishga majbur:
a) yo‘lovchini qo‘nish manziliga o‘zining boshqa muntazam qatnovida yoki boshqa tashuvchining bo‘sh joyi bo‘lgan qatnovida, tez fursatda, qo‘shimcha to‘lovlar olmagan holda, zarurat bo‘lganda yuqori xizmat ko‘rsatish toifasida va yo‘lovchi uchun qulay bo‘lgan boshqa shartlarda etkazish;
b) yo‘lovchini band qilingan chipta bilan ta’minlash;
v) yo‘lovchi tomonidan to‘langan xizmat ko‘rsatish toifasining o‘zgartirilishiga yo‘l qo‘ymaslik, agar xizmat ko‘rsatish toifasining bunday o‘zgarishiga yo‘l qo‘yilgan bo‘lsa, unda:
xizmat ko‘rsatish toifasi pastroq toifaga majburiy ravishda almashtirilganda, tashuvchi yo‘lovchiga yo‘nalishning xizmat ko‘rsatish toifasi o‘zgargan qismidagi (qismlaridagi) tariflar va yig‘imlar farqini qaytaradi;
xizmat ko‘rsatish toifasi yuqoriroq toifaga majburiy ravishda almashtirilganda va tashish narxi oshganida yo‘lovchidan qo‘shimcha yig‘im undirilmaydi;
g) bajarilmagan tashish uchastkasi uchun, pul qaytarilishi bilan, yig‘imlar olinmagan holda, chiptaning majburiy qaytarilishini ta’minlash.

Yo‘lovchi talabi bilan, tashish yo‘nalishining har qanday manzilidagi o‘zgarish tashish shartnomasining ixtiyoriy ravishda o‘zgartirilishi hisoblanib, ushbu o‘zgartirish tashish yo‘nalishining, xizmat ko‘rsatish toifasining yoki tarifining o‘zgarishiga sabab bo‘lishi mumkin.

 Yo‘lovchi tomonidan tashish uchun to‘langan to‘lovlar tashuvchi tomonidan majburiy tartibda qaytarilish hollarida, qaytariladigan pul miqdori quyidagi tartibda belgilanadi:
agar chiptaning hech bir qismidan foydalanilmagan bo‘lsa, qaytariladigan pul miqdori to‘langan tarif va yig‘imlarga teng bo‘lishi kerak;
agar chiptadan qisman foydalanilgan bo‘lsa, qaytariladigan pul miqdori to‘langan tarif va tashish amalga oshirilgan manzillar oralig‘idagi tashishga to‘langan tarif o‘rtasidagi farqga teng bo‘lishi kerak.

Agar yo‘lovchi tashish shartnomasining har qanday shartini (qatnov, uchish sanasi, yo‘nalishi, xizmat ko‘rsatish toifasi, chiptaning tashish uchun yaroqlilik muddati va hokazo) ixtiyoriy ravishda o‘zgartirmoqchi bo‘lsa, bu to‘g‘risida tashuvchini xabardor qilishi lozim. Bunda tashuvchi tashish shartnomasining yangi shartlari bo‘yicha tarifni hisoblashi kerak, agar tashish shartnomasining bunday ixtiyoriy o‘zgarishidan tashish qiymati oshadigan bo‘lsa, unda yo‘lovchi birinchi narxdagi miqdor bilan yangi narxdagi miqdor o‘rtasidagi farqlarni to‘lashi kerak. Agar bu o‘zgarish natijasida, yangi tashishning qiymati birinchi to‘langan narxdan past bo‘lsa, unda tashuvchi yo‘lovchiga tashish qiymatidagi farqni qaytarishi kerak.

Tashish bilan bog‘liq belgilangan tariflar va yig‘imlarning miqdoriga o‘zgartirishlar kiritilgan taqdirda, ushbu o‘zgartirishlar ular kiritilgunga qadar tuzilgan tashish shartnomalariga tashish boshlanish vaqtiga qadar tatbiq etilmaydi.
Agar tashish boshlanishiga qadar yo‘lovchining xohishi bilan tashish shartnomasiga o‘zgartirish kiritilgan taqdirda, yangi tashish sanasidagi tarif va yig‘imlarning miqdori asosida qaytadan chipta rasmiylashtiriladi.