• O‘zbekiston Respublikasi fuqarosining identifikatsiya ID-kartasi (keyingi o‘rinlarda — ID-karta) — O‘zbekiston Respublikasi hududida egasining shaxsini va O‘zbekiston Respublikasining fuqaroligini tasdiqlaydigan, ID-karta egasining shaxsiy biografik va biometrik ma’lumotlari kiritilgan elektron tashuvchi qurilma (chip)ga ega bo‘lgan hujjat;
• chip — ID-kartadagi biografik ma’lumotlar, raqamli fotosurat va qo‘l barmoq izi hamda boshqa ma’lumotlarni saqlovchi elektron qurilma;
• personallashtirish — ID-karta egasining biografik va biometrik ma’lumotlarini ID-kartaga kiritish;
• verifikatsiyalash — ID-kartaga kiritilgan biometrik ma’lumotlarning ID-karta egasining biometrik ma’lumotlariga mosligini maxsus texnik qurilma yordamida tekshirish;
• ma’lumotlarni yig‘ish punkti — ID-karta olish uchun murojaat qilgan fuqarolarning biografik va biometrik ma’lumotlarini jamlash, ID-kartalarni personallashtirish va berish vazifalarini bajaruvchi ichki ishlar organlarining migratsiya va fuqarolikni rasmiylashtirish bo‘linmalari hamda davlat xizmatlari markazlari;
• ID-karta olish uchun talabnoma (keyingi o‘rinlarda — talabnoma) — ID-karta oluvchi haqida ma’lumotlarni yig‘ish punkti tomonidan shakllantirilgan biografik va biometrik ma’lumotlarni o‘z ichiga olgan elektron hujjat.
• ID-karta O‘zbekiston Respublikasi mulkidir va uning egasi O‘zbekiston Respublikasi himoyasidadir.

ID-karta ma’lumotlarni yig‘ish punkti tomonidan fuqarolarga quyidagi muddatlarga beriladi:

• yangi tug‘ilgan bolaga bir yoshgacha — ikki yil muddatga (ota-onalar, vasiylarning (homiylarning) ixtiyoriga ko‘ra);
• bir yoshdan 16 yoshgacha — 5 yil muddatga (ota-onalar, vasiylarning (homiylarning) ixtiyoriga ko‘ra);
• 16 yoshdan — 10 yil muddatga.

ID-karta qat’iy hisobga olinadigan hujjat hisoblanadi.

ID-karta belgilangan namuna bo‘yicha lotin alifbosida o‘zbek tilida, Qoraqalpog‘iston Respublikasi uchun esa — ID-karta olish uchun murojaat qilgan fuqaroning xohishiga ko‘ra lotin alifbosida qoraqalpoq yoki o‘zbek tillarida personallashtiriladi.

ID-karta blankasiga quyidagi asosiy ma’lumotlar kiritiladi:

a) hujjatning nomi;

b) ID-kartaning raqami;

v) ID-karta egasining:

familiyasi, ismi, otasining ismi;

tug‘ilgan sanasi;

fuqaroligi;

tug‘ilgan joyi;

jinsi;

jismoniy shaxsning shaxsiy identifikatsiya raqami;

g) ID-kartaning:

berilgan sanasi;

kim tomonidan berilgani;

amal qilish muddati tugaydigan sana;

d) ID-karta egasining raqamli surati.

ID-kartada uning egasining imzosi bo‘lishi shart (16 yoshga etganidan keyin).

Vazirlik va idoralarning avtomatlashtirilgan tizimlari orqali ID-karta egasining roziligi bilan davlat xizmatlarini ko‘rsatishda ID-kartaga kiritilgan ma’lumotlardan foydalanishga ruxsat etiladi.

Chipga ID-karta egasining quyidagi ma’lumotlari kiritiladi:

• biografik ma’lumotlari;
• Oldingi tahrirga qarang.
• ingliz tilida familiya va ismi;
• millati;
• raqamli surati;
• qo‘l barmoqlarining izlari — 16 yoshga etganidan keyin;
• elektron raqamli imzo kalitining sertifikati — 16 yoshga etganidan keyin.
• Qonun hujjatlariga muvofiq chipga boshqa ma’lumotlar ham kiritilishi mumkin.

Elektron raqamli imzo kalitining sertifikati ID-kartaning amal qilish muddati davomida haqiqiy hisoblanadi.