Pilla etishtiruvchilarga subsidiya ajratiladi

“Ipakchilik sohasini yangi tizim asosida rivojlantirish hamda ozuqa bazasini mustahkamlashga doir qo‘shimcha chora-tadbirlar to‘g‘risida”gi Prezident qarori (PQ–87-son, 06.03.2026-y.) qabul qilindi.

Qarorga ko‘ra, 2026-yil 1 apreldan:

pilla etishtiruvchilarga (ipak qurti boquvchi va kasanachilarga) “mahalla ettiligi”ning kollegial qarori asosida pillachilik klasteri haqiqatda pilla uchun to‘lab bergan mablag‘larning 35 foizi miqdorida subsidiya ajratiladi;

O‘rmon va yashil hududlarni ko‘paytirish, cho‘llanishga qarshi kurashish agentligi (O‘rmon agentligi) balansidagi er maydonlarida tashkil etiladigan tutzorlarda pilla kooperativi tuzish maqsadlari uchun ushbu kooperativ a’zosi hisoblanadigan kambag‘al oilalarga (1 ta oilaning 1 nafar a’zosiga faqat 1-marta) 4 mln so‘mdan subsidiya ajratiladi;

ipak qurtini parvarishlashda zarur bo‘ladigan asbob-uskuna va jihozlarni xarid qilish uchun kasanachilarga 3 yil muddatga BHMning 50 baravarigacha miqdorda foizsiz ssuda ajratiladi;

✅ urug‘chilik korxonalariga ipak qurti urug‘larini tayyorlash faoliyatiga jalb etiladigan har bir mavsumiy ishchi oylik ish haqining 50 foizi, biroq mehnatga haq to‘lashning eng kam miqdorining 2 baravaridan oshmagan qismi kompensatsiya qilib beriladi.

Pillachilik klasterlariga soliq imtiyozlari beriladi

Qarorga ko‘ra, 2026-yil 1 yanvardan 2029-yil 1 yanvarga qadar:

pillachilik klasterlarining pilla etishtirish va saqlash uchun foydalaniladigan bino va inshootlari mol-mulk solig‘i hamda ular egallagan er uchastkalari er solig‘idan ozod qilinadi;

ipakchilik faoliyatidan olgan daromadlari joriy hisobot (soliq) davri yakunlari bo‘yicha jami daromadining kamida 70 foizini tashkil etgan ipakchilik korxonalariga foyda solig‘i 2 foiz miqdorida belgilanadi;

ipak mato va ipakdan tayyor mahsulotlar ishlab chiqarishni joriy qilgan korxonalar uchun ijtimoiy soliq 1 foiz stavkada belgilanadi.

Shuningdek, 2026-yil 1 yanvardan 2029-yil 1 yanvarga qadar ipak qurti urug‘larini tayyorlash va qurtxonalarda pilla etishtirish bo‘yicha mavsumiy ishlarga jalb qilingan aholining mazkur faoliyatdan olgan daromadi daromad va ijtimoiy soliqlarning soliqqa solish ob’ekti sifatida hisoblanmaydi.

Ipakchilik sohasida ozuqa bazasi mustahkamlanadi

Qarorga ko‘ra, tomchilatib sug‘orish tizimini joriy etish xarajatlari uchun yangidan tashkil etilgan tutzorlarning har bir gektariga Agrar sohada to‘lovlar agentligi tomonidan 8 mln so‘mgacha subsidiya taqdim etiladi.

Maydoni 2 va undan ziyod gektardagi tutzorlarga vertikal sug‘orish quduqlarini burg‘ilash va ishga tushirish, kanallar va boshqa suv havzalaridan suvni tortish uchun nasos stantsiyasi va suv inshootlarini yangidan qurish va rekonstruktsiya qilish bilan bog‘liq xarajatlarning 100 foiziga, biroq 150 mln so‘mdan oshmaydigan miqdorda subsidiya taqdim etiladi.

Mavjud tutzorlarni Qoraqalpog‘iston Respublikasi Vazirlar Kengashi, viloyatlar, tuman hokimliklari tomonidan olib qo‘yish hamda ular joylashgan er uchastkalarining er fondi toifasini o‘zgartirish qat’iy taqiqlanadi.

2026-yil 1 sentyabrga qadar “pillachilik.uz” elektron platformasi (Platforma) ishga tushiriladi. Bunda:

► mavjud tutzorlar er maydonlari, pilla etishtiruvchi va qayta ishlovchi korxonalar ro‘yxati, maqsadli ko‘rsatkichlar va tuzilgan shartnomalar, ipak qurti urug‘ining tarqatilishi hamda pilla hosilini qabul qilish jarayonlari Platformada aks ettirib boriladi;

► Platforma doirasida pilla etishtirish agrotexnikasi qoidalari to‘g‘risida o‘quv qo‘llanmalar va mediakontentlarni o‘z ichiga olgan mobil ilova ishlab chiqiladi.