O‘zbekistondagi avtomobillarga gaz to‘ldirish kompressor shoxobchalarida UGaz tizimi ishga tushirilmoqda. U AGTKSHdagi jarayonlarni real vaqt rejimida qayd etib boradi, avtomobillarning texnik ko‘rikdan o‘tgani, yonilg‘i turi mosligi yoki ballon ro‘yxatdan o‘tkazilgani kabilarni avtomatik tekshiradi.

O‘zbekistonda “Yagona integrator Uzinfocom” tomonidan avtomobillarga gaz to‘ldirish kompressor shoxobchalaridagi (AGTKSH) jarayonni real vaqt rejimida qayd etib boradigan UGaz tizimi joriy etildi. Bu haqda Energetika vazirligi axborot xizmati xabar qildi.

Tizimni o‘rnatish 2024-yilning 6-iyulida qabul qilingan “Tabiiy gaz resurslaridan oqilona foydalanish chora-tadbirlari to‘g‘risida”gi Vazirlar Mahkamasi qaroriga muvofiq AGTKSHlar orqali siqilgan gazni sotish uchun litsenziya olish talablaridan biri etib belgilangan.

Ta’kidlanishicha, UGaz tizimi har bir gaz quyish shoxobchasida jarayonni real vaqt rejimida qayd etish bilan birga:

• qo‘lda hisob-kitob olib borish zaruratini kamaytiradi;
• noqonuniy holatlarning oldini oladi;
• jarayon shaffofligini ta’minlaydi;
• iste’molchilar uchun xavfsizlik darajasini oshiradi.

Avtomobil GQSHga kirgan vaqtda uning texnik ko‘rikdan o‘tgani avtomatik tarzda tekshiriladi. Agar texnik ko‘rik muddati tugagan bo‘lsa, tizim operatorga xabar beradi. Shuningdek, yonilg‘i turi mos kelmagan yoki ballon ro‘yxatdan o‘tkazilmagan taqdirda, tizim operatorni shu joyning o‘zida ogohlantiradi. Bu orqali AGTSHK, haydovchi va yo‘lovchilar xavfsizligi ta’minlanadi, deyiladi xabarda.

“Tizim orqali GQSH qabul qilib olayotgan gaz hajmlarining aniq hisob-kitobi yuritiladi. Bu esa GQSHlarning tabiiy gazdan noqonuniy foydalanish holatlarining oldini olishga xizmat qiladi va gaz sotish jarayonlarining shaffofligini ta’minlaydi”.

Bundan tashqari, AGTKSHlardagi har bir gaz to‘ldirish kolonkasi va undagi xodim faoliyati onlayn nazorat qilinadi. AGTKSH xodimlarining barcha xizmat ko‘rsatish jarayonlari manfaatdor vazirlik va idoralar (Ichki ishlar vazirligi, Davlat soliq qo‘mitasi, “Toshshahartransxizmat” AJ, Elektron hukumat tizimlari, “Energonazorat” platformasi va OneID) bilan integratsiya qilingan.