Noyabrdan boshlab prezident huzuridagi Tadbirkorlikni qo‘llab-quvvatlash bo‘yicha jamoatchilik kengashi tarkibida Korporativ etika komissiyasi ish boshlaydi. U kompaniyalarga tavsiyalar beradi, etika kodeksini ishlab chiqadi va korporativ nizolarni sudga murojaat qilmasdan hal qiladi.

O‘zbekistonda mas’uliyati cheklangan jamiyatlar (MChJ) ishtirokchilarining kirish-chiqishining soddalashtirilgan mexanizmi joriy etilmoqda. Bu prezidentning 5-sentabrdagi qarorida ko‘zda tutilgan.

Hujjatga ko‘ra, endi ko‘p hollarda ishtirokchining MCHJ tarkibiga kiritilishi yoki chiqarilishi endilikda harakat haqiqatda amalga oshirilgan yoki voqea sodir bo‘lgan paytdan, masalan, sud qarori qonuniy kuchga kirgan paytdan, meros huquqi to‘g‘risidagi guvohnoma taqdim etilgandan yoki bitim E-auksion yoki notarius orqali amalga oshirilgan paytdan boshlab sodir bo‘lgan hisoblanadi.

Jamiyatlarga endi a’zolik tarkibidagi o‘zgarishlarni ro‘yxatga olish uchun umumiy yig‘ilish qarori talab qilinmaydi — boshqa ishtirokchilarni xabardor qilish va o‘zgarishlarni Yagona davlat reyestriga kiritish kifoya. Agar jamiyat 30 kun ichida reyestrga o‘zgartirishlarni kiritmasa, manfaatdor shaxs buni mustaqil ravishda amalga oshirishi mumkin.

Biroq soliq qarzining mavjudligi ro‘yxatga olishni rad etish uchun asos bo‘la olmaydi.

Shuningdek, davlat ishtirokidagi korxonalar va davlat muassasalari ixtiyoriy ravishda tugatilishi yoki muassislarning qarori bilan Davlat aktivlarini boshqarish agentligi bilan kelishilgan holda qayta tashkil etilishi mumkinligi belgilandi.

Korporativ axloq komissiyasi

2025-yil 1-noyabrdan prezident huzuridagi Tadbirkorlikni qo‘llab-quvvatlash bo‘yicha jamoatchilik kengashi huzurida Korporativ etika komissiyasi tashkil etiladi. U korporativ etika kodeksini ishlab chiqishda, shuningdek, nizolarni sudgacha hal qilishda kompaniyalarga tavsiya va yordam beradi. Savdo-sanoat palatasi komissiyaning ishchi organi etib belgilandi.

Prezident huzurida 2022-yilda Tadbirkorlikni qo‘llab-quvvatlash bo‘yicha jamoatchilik kengashi tashkil etilgandi. 2024-yil dekabr oyida tadbirkorlar bilan uchrashuvda Shavkat Mirziyoyev kengash tarkibida IT, fintex, biznesni moliyalashtirish, eksport, turizm, xizmat ko‘rsatish, yashirin iqtisodiyotni qisqartirish yo‘nalishlari bo‘yicha ekspert guruhlarini tashkil etishni taklif qilgan.

Tadbirkorlik subyektlarini davlat ro‘yxatidan o‘tkazishning avtomatlashtirilgan tizimida yuridik shaxslarning ta’sischilari (ishtirokchilari) ulushlari to‘g‘risidagi ma’lumotlarni doimiy ravishda yangilab borish onlayn xizmati joriy etilmoqda. Ushbu ma’lumotlar ishtirokchilarning o‘zlari uchun ochiq bo‘ladi, shuningdek, o‘zlariga tegishli ulushni begonalashtirishga taqiq qo‘yish imkoniyati paydo bo‘ladi.

Adliya vazirligi 2026-yilning martiga qadar MCHJ ishtirokchilari ulushni sotib olish bo‘yicha imtiyozli huquqini amalga oshirish va bunday huquqdan voz kechish to‘g‘risida elektron tarzda xabardor qilinishini, shuningdek, Notarius tizimi bilan integratsiyalashuvini ta’minlaydi.