Moped va skuterlarni boshqarish uchun haydovchilik guvohnomasi talab etila boshlaydi, “chiroyli” davlat raqami belgilarining auksion savdolari to‘xtatiladi, “Har bir mahallada futbol maydoni” dasturi joriy etiladi — 1-oktabrdan kuchga kiradigan shu va boshqa qonunchilik o‘zgarishlari Gazeta sharhida.

---

Sudyalik lavozimlariga nomzodlar kasbiy qayta tayyorlash kurslarida o‘qitiladi

Prezident 21-avgustda imzolagan farmonga ko‘ra, O‘zbekistonda Sudyalar oliy maktabi negizida Odil sudlov akademiyasi tashkil etilmoqda. Akademiya sudyalik lavozimlariga nomzodlarni o‘qitish, amaldagi sudyalar vasud apparati xodimlarining malakasini oshirish bilan shug‘ullanadi.

2025-yil 1-oktabrdan boshlab sudyalik lavozimlariga nomzodlar davlat granti asosida olti oylik kasbiy qayta tayyorlash kurslarida o‘qitiladi.

Kurslarga qabul qilingan shaxslar ularning egallagan lavozimi butun o‘qish davri mobaynida saqlangan holda asosiy ish joyi bo‘yicha lavozimidan ozod qilinadi.

O‘qish davrida tinglovchilarga sudya yordamchisining 1 oylik mehnatiga haq to‘lash fondi miqdorida har oyda stipendiya to‘lanadi.

---

Prezident huzuridagi Davlat boshqaruvi akademiyasida rahbarlar uchun kurslar tashkil qilinadi

Shavkat Mirziyoyev 5-may kuni imzolagan farmon bilan prezident huzuridagi Davlat boshqaruvi akademiyasi Davlat siyosati vaboshqaruvi akademiyasi etib qayta tashkil etilmoqda.

Akademiyaning asosiy vazifalaridan biri etib davlat xizmatchilarining malakasini muntazam oshirib borish va qayta tayyorlash, shuningdek, boshqaruv kadrlarini magistratura vaoliy ta’limdan keyingi ta’lim bosqichlarida o‘qitish belgilandi.

2025-yil 1-oktabrdan akademiyada davlat xizmatidagi rahbarlar, rahbarlikka nomzodlar va boshqaruv kadrlari malakasini oshirish bo‘yicha qisqa muddatli kurslar joriy etiladi.

---

Davlat xizmatchilarining xizmat safarlarini tashkil etish hrm.argos.uz elektron tizimi orqali amalga oshiriladi

19-iyun kuni Shavkat Mirziyoyev tomonidan imzolangan farmonga ko‘ra, 2025−2026-yillarda davlat fuqarolik xizmatini yangi yondashuvlar asosida tashkil etishning asosiy yo‘nalishlari belgilandi.

Xususan, hujjatga ko‘ra, 2025-yil 1-oktabrdan davlat xizmatchilarining xorijiy va ichki xizmat safarlarini tashkil etish, hisobini yuritish va tahlilini olib borish hrm.argos.uz elektron tizimi tarkibidagi “Xizmat safari” yagona moduli orqali amalga oshiriladi.

---

Moped va skuterlarni boshqarish uchun haydovchilik guvohnomasi talab etiladi

Vazirlar Mahkamasining 12-apreldagi qaroriga muvofiq, 1-oktabrdan moped va skuterlarni boshqarish uchun haydovchilik guvohnomasi talab etila boshlaydi.

Xavfsiz harakatlanish uchun moped va skuter haydovchilari yo‘l harakati qoidalarini bilishi vaularga rioya etishi shart, shuning uchun Vazirlar Mahkamasining 2024-yil 9-avgustdagi 493-son qaroriga asosan ular malaka oshirishdan o‘tishi va “A” toifasidagi haydovchilik guvohnomasiga ega bo‘lishi shart.

Hukumatning 2024-yil 8-iyul va 9-avgustdagi qarorlariga bilan 1-martdan moped vaskuterlarga yangi talablar: majburiy davlat ro‘yxatidan o‘tish, davlat raqami belgilarini olish vaularni boshqarish uchun “A” toifali haydovchilik guvohnomasiga ega bo‘lish joriy etilishi rejalashtirilgan edi.

Vazirlar Mahkamasining 12-apreldagi qarori bilan haydovchilik guvohnomalariga oid ushbu muddat yana olti oyga — 1-oktabrga ko‘chirildi. Hukumat, shuningdek, ekspluatatsiyadagi moped va skuterlarni davlat ro‘yxatidan o‘tkazish tartibi to‘g‘risidagi vaqtinchalik nizomning amal qilish muddatini 31-sentabrgacha uzaytirdi.

---

Yengil sanoat korxonalariga qator moliyaviy qo‘llab-quvvatlash choralari qo‘llanadi

Prezidentning 19-sentabrdagi farmoni bilan, Vazirlar Mahkamasi huzurida Yengil sanoatni rivojlantirish agentligi tashkil etilmoqda.

Agentlik qoshida Yengil sanoatni qo‘llab-quvvatlash jamg‘armasi tashkil etiladi. Agentlik tomonidan yengil sanoat sohasidagi korxonalarga 2025-yil 1-oktabrdan qator moliyaviy qo‘llab-quvvatlash choralari qo‘llanadi.

Xususan, tashkilot xalqaro brendlarni jalb qilish, standartlashtirish vasertifikatlashning xalqaro tizimlarini, moliyaviy hisobotlarning xalqaro standartlarini joriy etish ishlari bilan shug‘ullanadi. Shuningdek, eksport shartnomalari bo‘yicha sug‘urtalashni moliyalashtirish xarajatlarini qoplaydi hamda mutaxassislarni o‘qitish uchun grantlar ajratadi.

---

“Chiroyli” davlat raqami belgilarining auksion savdolari to‘xtatiladi

Vazirlar Mahkamasining 4-sentabrdagi qaroriga muvofiq, “O‘zbekiston respublika tovar-xomashyo birjasi” 2025-yil 1-oktabrdan boshlab “chiroyli” davlat raqami belgilarining auksion savdolarini to‘xtatadi.

Auksionga qo‘yilib, sotilmagan, shuningdek, ishlab chiqarilib,sotilmagan xaridorgir harf varaqamlar kombinatsiyasiga ega bo‘lgan davlat raqami belgilari:

1−3-toifadagi davlat raqami belgilari — Uzavtomotobelgi davlat unitar korxonasi tomonidan belgilangan yagona oshirilgan to‘lov evaziga beriladi;

4−6-toifadagi davlat raqami belgilari — xaridorgir harf va raqamlar kombinatsiyasiga ega bo‘lmagan davlat raqami belgilarini berishning amaldagi tartibida beriladi.

---

“Har bir mahallada futbol maydoni” dasturi joriy etiladi

2025-yil 1-oktabrdan boshlab mahallalarda futbol maydonlarini barpo etish bo‘yicha “Har bir mahallada futbol maydoni” dasturi joriy etiladi. Bu 21-avgust kuni imzolangan prezident qarorida ko‘zda tutilgan.

Dastur doirasida:

• mahallalardagi bo‘sh turgan davlat mulki obyektlari (yer uchastkalari) ularning bir qismida futbol maydoni barpo etish va kamida 10 yil mobaynida uning foydalanish maqsadini o‘zgartirmaslik sharti bilan elektron onlayn auksion savdolariga chiqariladi;
• elektron onlayn auksion savdolari g‘oliblariga xarid qilingan bo‘sh turgan davlat mulki obyekti (yer uchastkasi)ning qolgan qismidan qonunchilikda belgilangan tartibda foydalanish va tasarruf etish huquqi beriladi;
• elektron onlayn auksion savdolariga chiqarilgan davlat mulki obyektlari (yer uchastkalari) uch oy davomida sotilmagan taqdirda, ularning boshlang‘ich bahosi bosqichma-bosqich 10 foizdan, lekin ko‘pi bilan 50 foizgacha pasaytirilgan holda va sotib olish to‘lovlarini uch yilgacha bo‘lib-bo‘lib to‘lash sharti bilan savdolarga chiqariladi.

---

Qimmatli qog‘ozlarni sotish va fondlarni moliyalashtirishda investitsiya platformalaridan foydalanishga ruxsat beriladi

21-avgustdagi prezident qaroriga muvofiq, 2025-yil 1-oktabrdan 2026-yil 1-oktabrgacha investitsiya platformalaridan “Tartibga solish qumdoni” maxsus huquqiy rejimida quyidagi yo‘nalishlar bo‘yicha foydalanishga ruxsat beriladi:

• qimmatli qog‘ozlarni joylashtirish va sotish;
• venchur vapay fondlarini moliyalashtirish;
• kommandit shirkatlarga hissa kiritish.

Maxsus huquqiy rejim doirasida:

• yuridik shaxs maqomiga ega tadbirkorlik subyektlari investitsiya jalb etishni talab etadigan loyihalarini hamda ulushga ega bo‘lish orqali tadbirkorlik faoliyatida ishtirok etishga oid takliflarini investitsiya platformalarida joylashtirishga haqli;
• investorlar investitsiya platformalarida e’lon qilingan investitsiya loyihalarini tanlash va ularga mablag‘ kiritish orqali investitsiya faoliyatini amalga oshirish hamda shu orqali foyda olish huquqiga ega;
• investitsiya platformalari orqali amalga oshiriladigan loyihalarni boshqarish investitsiya va boshqaruv kompaniyalari orqali ham amalga oshirilishi mumkin.

---

Davlat idoralari hududlaridan mavsumiy savdo, umumiy ovqatlanish va xizmat ko‘rsatish uchun foydalanish mumkin bo‘ladi

Vazirlar mahkamasining 31-iyuldagi qarori bilan, 2025-yil 1-oktabrdan boshlab umumiy ovqatlanish, savdo va xizmat ko‘rsatish sohasidagi tadbirkorlik subyektlari davlat organlari va tashkilotlariga doimiy foydalanishga berilgan yer uchastkalaridan mavsumiy faoliyatni amalga oshirish uchun foydalanishi mumkin bo‘ladi.

Bu xiyobonlar, bog‘lar, sayr joylari, bulvarlar, sug‘orish ariqlari bo‘yidagi hududlar, shuningdek, maydonlar, ko‘chalar, qirg‘oqbo‘yi hududlari va shunga o‘xshash yerlarga tegishli. Sog‘liqni saqlash, ta’lim va maktabgacha ta’lim tashkilotlariga tegishli yer uchastkalari bundan mustasno.

---

“Yashil makon” platformasida daraxt ekiladigan maydonlar koordinatalari kiritiladi

Prezidentning 30-maydagi farmoniga muvofiq, 1-oktabrdan boshlab “Yashil makon” platformasida daraxt ekish mumkin bo‘lgan maydonlarning koordinatalari, ularni parvarish qilish va tavsiya etilgan daraxt turlari to‘g‘risidagi ma’lumotlar ko‘rsatiladi.

Ushbu hujjat bilan Ekologiya, atrof-muhitni muhofaza qilish va iqlim o‘zgarishi vazirligi huzuridagi O‘rmon xo‘jaligi agentligi negizida O‘rmon va yashil hududlarni ko‘paytirish, cho‘llanishga qarshi kurashish agentligi tashkil etilmoqda.

Yangi idora o‘rmonlarning davlat hisobi va o‘rmon kadastrini yuritadi, shuningdek, daraxt va buta ko‘chatlari pitomniklarini kengaytirish bilan shug‘ullanadi.

---

Pensiyalarni naqd shaklda biometrik identifikatsiyalash va ERI orqali berish boshlanadi

2025-yil 1-oktabrdan boshlab Xalq bankida pensiyalarni naqd shaklda berishda Face-ID biometrik identifikatsiya vaelektron raqamli imzolardan foydalaniladi. Bu prezidentning 27-maydagi nogironligi bo‘lgan shaxslarga pensiya va kompensatsiyalar tayinlashning soddalashtirilgan tartibini joriy etishga qaratilgan qarorida ko‘zda tutilgan.

To‘lov oluvchilar to‘lov qaydnomalarini planshetda elektron shaklda imzolashlari mumkin bo‘ladi. Adliya vazirligi Pensiya jamg‘armasi va Xalq bankining elektron so‘roviga ko‘ra biometrik identifikatsiyalash uchun ma’lumotlarni taqdim etadi.

---

Aholiga naqd pul shaklida beriladigan ayrim moliyaviy yordamlar ijtimoiy karta orqali ajratiladi

Vazirlar Mahkamasining 11-mart kungi qarori bilan Kambag‘allikni qisqartirish davlat maqsadli jamg‘armasi faoliyatini tashkil etish tartibi tasdiqlangan edi.

Qarorga ko‘ra, 2025-yilning 1-oktabridan jamg‘arma mablag‘lari hisobidan fuqarolarga naqd pul shaklida beriladigan mablag‘lar bosqichma-bosqich ijtimoiy karta orqali taqdim etiladi.

---

Tovarlarni olib kirish va olib chiqish “Yagona darcha” bojxona axborot tizimi orqali rasmiylashtiriladi

2025-yil 1-oktabrdan tovarlarni olib kirish, olib chiqish va tranzit olib o‘tish bo‘yicha barcha sertifikat, xulosa va ruxsat etish xususiyatiga ega hujjatlar faqat “Yagona darcha” bojxona axborot tizimi orqali rasmiylashtiriladi.

Bu 25-mart kuni prezidentning “Davlat bojxona xizmati organlarining faoliyatini tashkil etish va bojxona ma’muriyatchiligini yanada takomillashtirishning qo‘shimcha chora-tadbirlari to‘g‘risida”gi qarorida [PQ-122-son] belgilangan.