Madad NNT ijrochi direktori Sh. Saidov 2025 yil 29 sentabr kuni Korrupsiyaga qarshi kurashish agentligi rahbari A. Burxonov va agentlik masʼul xodimlari bilan uchrashuv o‘tkazdi. 

Uchrashuvda tashkilot tomonidan amalga oshirilayotgan ishlar haqida axborot berildi va agentlikning mamlakatimizda korrupsiya holatini tizimli tahlil qilish, korrupsiya xavflari yuqori bo‘lgan sohalarni aniqlash, korrupsiyaning oldini olish va unga qarshi kurashishda xalqaro hamkorlikni rivojlantirish borasidagi saʼy-harakatlari yuqori baholanishi bildirildi.

Agentlik fuqarolarning huquqiy ongini oshirish, jamiyatda korrupsiyaning barcha ko‘rinishlariga murosasiz munosabatni shakllantirish, korrupsiya holati, tendensiyalari va sabablari bo‘yicha sotsiologik, ilmiy tadqiqotlar tashkil etish orqali korrupsiyaga qarshi choralarni aniqlashda samaradorlikni taʼminlashga intilayotganini taʼkidladi. Madad NNTning maqsadlari bilan bu boradagi faoliyatlar hamohang ekanligi qayd etildi. 

“Madad” NNT ekspert salohiyati va boy tajribasi bilan agentlikning bu yo‘nalishdagi faoliyatida yaqindan hamkorlik qilishga tayyorligini bildirgan holda, quyidagi yo‘nalishlarda birgalikda tadbirlar tashkil etish taklifi bildirildi:

• jamiyatda aholining huquqiy ongi va huquqiy madaniyatini oshirishga ko‘maklashish;

• davlat organlari va tashkilotlari ustidan jamoatchilik nazoratini olib borish jarayonida faol qatnashish;

• ijtimoiy-iqtisodiy masalalar yuzasidan joylarda jamoatchilik fikrini o‘rganish yuzasidan sotsiologik so‘rovlar o‘tkazish;

• qonun ijodkorligi.

Ushbu uchrashuv ikki tomonlama hamkorlikni yangi bosqichga olib chiqish, korrupsiyaga qarshi kurashda samaradorlikni oshirish uchun muhim qadam bo‘lib xizmat qilishi maʼlum qilindi.