“Eko-madaniyat” umummilliy loyihasi doirasida ekologik taʼlim, ilm-fan va targ‘ibotni jadallashtirishga oid kompleks chora-tadbirlar to‘g‘risida”gi Prezident qarori (PQ–110-son, 25.03.2026 y.) qabul qilindi.

Quyidagilar ushbu qarorni qabul qilishdan ko‘zlangan asosiy maqsadlar etib belgilandi:

♦ 2026-2027 yillar davomida respublikaning har bir hududida o‘rta bo‘g‘in kadrlarini tayyorlaydigan 14 ta “yashil” texnikumlar faoliyatini yo‘lga qo‘yish;

♦ 2030 yilgacha respublikaning har bir hududidagi “yashil” texnikumlarda 10 000 nafar o‘rta bo‘g‘in kadrlarini tayyorlash uchun ekologik taʼlim va ilmni yana-da rivojlantirish.

♦ 2026–2028 yillarda ekologiya, atrof-muhitni muhofaza qilish va iqlim o‘zgarishi sohasida ilmiy daraja olgan nomzodlar sonini 150 nafargacha yetkazish.

2026/2027 o‘quv yilidan mazkur qarorda ko‘rsatilgan taʼlim muassasalari “yashil” texnikumlar sifatida qayta tashkil etiladi hamda ularda hududning ekologik, ijtimoiy va iqtisodiy sharoitlaridan kelib chiqib, sohalar uchun o‘rta bo‘g‘in kadrlarini tayyorlash tizimi yo‘lga qo‘yiladi.

“Yashil” texnikumlarning moddiy-texnika bazasini yaxshilash va taʼlim sifatini oshirish maqsadida ular Kasbiy taʼlim agentligi bilan kelishuv asosida Markaziy Osiyo atrof-muhit va iqlim o‘zgarishini o‘rganish universiteti (Universitet) ga biriktiriladi.

Qarorga ko‘ra, Universitet hamda “Yashil” texnikumlar taʼlim tizimining uzviyligini taʼminlash maqsadida 2026/2027 o‘quv yilidan boshlab: 

“yashil” texnikumlarda taʼlim jarayoni Universitet tomonidan ishlab chiqiladigan va Kasbiy taʼlim agentligi tasdiqlaydigan taʼlim dasturlari asosida tashkil etiladi;

✔️ “yashil” texnikumlarda majburiy va tanlov fanlari Universitet tomonidan belgilanadi;

Universitetning 1-bosqichida o‘qitiladigan mutaxassislik fanlari “yashil” texnikumlarning 2-bosqich o‘quv dasturlariga maxsus kurs sifatida kiritiladi;

☑️ “yashil” texnikumlarni muvaffaqiyatli bitirgan ingliz tilidan V2 darajaga ega bo‘lgan bitiruvchilarga Universitet tomonidan belgilangan ballar o‘rtacha qiymatidan (GPA) kelib chiqib, bakalavriatning 2-bosqichidan o‘qishni davom ettirishga ruxsat beriladi;

“yashil” texnikumlarda Ekostipendiya taʼsis etiladi va har yili 10 nafargacha iqtidorli o‘quvchilarga mehnatga haq to‘lashning eng kam miqdoridan kam bo‘lmagan miqdorda stipendiya to‘lanadi.

Qarorga ko‘ra, 2026 yildan oliy taʼlim tashkilotlari tomonidan yashil kampus loyihalari ishlab chiqiladi va Ekologiya qo‘mitasi bilan kelishiladi.

2026 yil 1 maydan “10 ming qadam piyoda” tajribasi qayta tiklanadi hamda “Sog‘lom turmush tarzi” platformasi faoliyati yo‘lga qo‘yiladi.

Shuningdek, 2026 yil 1 maydan boshlab quyidagi darajalarda  “Yosh ekolog” ko‘krak nishoni taʼsis etiladi: 

♦ maktab o‘quvchilari o‘rtasida III darajali “Yosh ekolog”;

♦ texnikum o‘quvchilari va oliy taʼlim muassasalari talaba-yoshlari o‘rtasida II darajali “Yosh ekolog”;

♦ xalqaro va mahalliy miqyosda yuqori natijalarga erishgan yoshlar o‘rtasida I darajali “Yosh ekolog”.