Vazirlikning taʼkidlashicha, P2P-o‘tkazmalar orqali tushadigan daromadlarning bir qismi soliq hisobotlarida aks ettirilmayapti, shu sababli davlat byudjeti tegishli mablag‘larni to‘liq ololmayapti.

Soliq organlari hisob-kitoblar P2P-o‘tkazmalar - mablag‘larni kartadan-kartaga o‘tkazish orqali amalga oshiriladigan savdo bilan shug‘ullanuvchi ayrim xo‘jalik yurituvchi subyektlar faoliyatini tahlil qilishni boshladi. Bu haqda DSQ matbuot xizmati xabar berdi.

Taʼkidlanishicha, bunday operatsiyalar orqali tushadigan daromadlarning bir qismi soliq hisobotlarida aks ettirilmaydi, shu sababli davlat byudjeti tegishli tushumlarni to‘liq olmaydi. Shu munosabat bilan hozirda yuridik shaxslar rahbar xodimlarining bank kartalariga pul mablag‘lari tushumi bo‘yicha tahliliy tekshiruvlar o‘tkazilmoqda.

Soliq hisobotida aks ettirilmagan daromadlarning aniqlangan holatlari bo‘yicha tegishli choralar ko‘riladi va soliq to‘lovchilarga xabarnomalar yuboriladi.

"Ushbu jarayon jazolash yoki bosim o‘tkazish uchun emas, balki iqtisodiy adolatni taʼminlash, yashirin aylanmani kamaytirish va qonun doirasida halol ishlayotgan tadbirkorlarni qo‘llab-quvvatlashga qaratilgan. Zero, to‘langan har bir soliq mamlakat taraqqiyotiga, yangi yo‘llar, maktablar, shifoxonalar qurilishiga, aholi farovonligini oshirishga qo‘shilgan hissadir," deyiladi xabarda.

DSQ barcha tadbirkorlik subyektlarini amaldagi qonunchilik talablariga qatʼiy rioya qilishga, savdo tushumlarini to‘liq rasmiylashtirishga va ularni soliq hisobotlarida ishonchli aks ettirishga chaqirdi.