Parvozning davriyligi 14 kun bo‘ladi. Kosmonavtlarni saralash dasturi maʼlum qilindi.

O‘zbekistonning kosmonavtini koinotga uchirish 2028 yil oktyabr oyigacha amalga oshiriladi. Bu haqda “O‘zbekkosmos” agentligi direktori o‘rinbosari Muhiddin Ibragimov matbuot anjumanida maʼlum qildi. 

Uning aytishicha, parvozning davriyligi 14 kun bo‘ladi.

“Dunyoda 3 ta davlat bor: AQSH, Rossiya va Xitoy. Bular kosmonavtlarni kosmosga to‘liq uchiroladi. AQSH va Rossiya bitta xalqaro kosmik stansiyaga uchiradi. Xitoyning o‘zini alohida stansiyasi bor. Biz hozir barcha muzokaralarni olib bormoqdamiz. Har bir taraf o‘zini tayyoriligini bildirdi. Kosmonavtimiz kosmosga uchganda olamshumul bo‘lmasa ham biror eksperiment natijasi bilan yerga qaytib keladi”, - deydi u.

Kosmonavtni tayyorlashda hukumat komissiyasi bo‘ladi va nomzodlar saralab olinadi.

Nomzodlarga asosiy 27-40 yosh, oliy maʼlumotli, bo‘yi 160-190 cm oralig‘ida, vazni 50-95 kg va tillarni bilishi talabi qo‘yiladi.