Loyihaning birinchi bosqichida “Mingo‘rik — Janubiy vokzal”, ikkinchi bosqichida esa uni Chilonzor buyum bozorigacha uzaytirish rejalashtirilmoqda.

Shavkat Mirziyoyev Toshkent metropolitenida yo‘lovchilarga xizmat ko‘rsatish sifati va xavfsizligini taʼminlash, shuningdek, infratuzilmadan samarali foydalanish bo‘yicha takliflar taqdimoti bilan tanishdi.

Taqdimotda Toshkentda “Mingo‘rik” stansiyasidan Chilonzor buyum bozorigacha yangi metro liniyasi qurish rejasi maʼlum qilindi. Loyiha amalga oshirilgach, metro tarmog‘i 79 ta stansiya va umumiy 103 kilometr uzunlikka yetishi kutilmoqda.

2030 yilga borib, metropolitenning kunlik yo‘lovchi oqimi 1,8 million nafargacha oshishi prognoz qilingan.

Metroni rivojlantirish doirasida yo‘l haqini to‘lash tizimini optimallashtirish, yangi poyezdlar xarid qilish, elektr depolari qurish hamda poyezdlar harakati oralig‘ini 1,5–3 daqiqagacha qisqartirish rejalashtirilgan.

Uzoq muddatli strategiyaga ko‘ra, metro tarmog‘ini ikki barobar kengaytirish, tashish hajmini 2,5 barobar oshirish, energiya tejamkor va xavfsiz transport tizimini yaratish hamda yo‘lovchilar uchun qulayliklarni kuchaytirish nazarda tutilgan.

Shuningdek, vagonlar va platformalardagi raqamli reklama maydonlarini xususiy sektorga ijaraga berish, stansiyalarda vending apparatlari va kichik savdo nuqtalarini joylashtirish, metro atrofida avtoturargohlar tashkil etish taklif qilindi.

Bundan tashqari, bo‘sh turgan bino va xonalarni kovorking hududlari hamda kichik ofislar sifatida ijaraga berish rejalashtirilmoqda.

Avtomobil transportidan metro tizimiga qulay o‘tishni taʼminlash maqsadida “Park&Ride” tizimini joriy etish taklif qilingan.

Taqdimotda metro parkini yangilash va yangi elektr depolari qurish masalalari ham muhokama qilindi. 2027–2030 yillarda zarur harakat tarkibini xarid qilish bo‘yicha takliflar ishlab chiqiladi.

Shavkat Mirziyoyev taqdim etilgan rejalar bilan tanishib, metro shahar infratuzilmasi uchun muhim ahamiyatga ega ekanini taʼkidladi va loyihalarni amalga oshirishni boshlash bo‘yicha topshiriq berdi.