“Ijtimoiy ish to‘g‘risida”gi Qonun (O‘RQ–1159-son, 23.07.2026 y.) qabul qilindi

Ushbu Qonunning maqsadi ijtimoiy ish sohasidagi munosabatlarni tartibga solishdan iborat.

Qonunga ko‘ra, ijtimoiy ish – ijtimoiy himoyaga muhtoj shaxslarning imkoniyat va salohiyatini oshirishga ko‘maklashadigan, ijtimoiy xizmatlar va ijtimoiy yordamni rivojlantirish orqali jamiyatda ijtimoiy o‘zgarishlarga olib keladigan kasbiy faoliyat sohasidir.

Ijtimoiy ish tibbiyot, taʼlim, ijtimoiy himoya, bandlik, sud va huquq-tartibot, jazoni ijro etish sohalarida tashkil etiladi.

Ijtimoiy himoya milliy agentligi ijtimoiy ish sohasidagi maxsus vakolatli davlat organidir.

Ijtimoiy xizmatlar va ijtimoiy yordam birlamchi, ixtisoslashgan va yuqori ixtisoslashgan darajalarga bo‘linadi.

Ijtimoiy xizmatlar va ijtimoiy yordam:

♦ ijtimoiy xizmatlar va ijtimoiy yordamdan foydalanuvchining yashash joyida, shu jumladan Internet jahon axborot tarmog‘i orqali;

♦ ijtimoiy xizmatlar va ijtimoiy yordamdan foydalanuvchining mahallasida;

♦ ijtimoiy xizmatlar ko‘rsatuvchilarning muassasalarida, shu jumladan statsionar muassasalarda ko‘rsatiladi.

Ijtimoiy xizmatlar va ijtimoiy yordam ko‘rsatish uchun quyidagilar asos bo‘ladi:

♦ ijtimoiy himoyaga muhtoj shaxsning (oilaning) yoki uning qonuniy vakilining murojaati;

♦ ijtimoiy himoyaga muhtoj shaxsning (oilaning) yoki uning qonuniy vakilining ijtimoiy xizmatlar va ijtimoiy yordam ko‘rsatish shartlariga roziligi.

☑️ Ijtimoiy himoya milliy agentligi huzuridagi Ijtimoiy inspeksiya aholini ijtimoiy himoya qilishda hamda ijtimoiy xizmatlar va ijtimoiy yordam ko‘rsatishda qonunchilik talablariga rioya etilishi ustidan nazorat qiluvchi vakolatli davlat organidir.