Сўнгги йилларда халқ депутатлари маҳаллий Кенгашларининг ҳудудларни ижтимоий-иқтисодий ривожлантириш ва аҳолини ижтимоий ҳимоя қилишга оид ваколатлари кенгайтирилди. Шу муносабат билан маҳаллий Кенгашларнинг ваколатлари, вазифалари ва функцияларини аниқ тизимлаштириш, уларни мониторинг қилиш ҳамда ягона очиқ электрон ахборот базасини шакллантириш мақсадида махсус реестрни юритиш тартиби белгиланди.

Реестр нима учун юритилади?

Реестрни юритишнинг асосий мақсади маҳаллий давлат ҳокимияти вакиллик органларининг вазифа ва функцияларини тизимлаштириш, мониторинг қилиш ва улар ҳақидаги маълумотларни ягона очиқ электрон базада жамлашдан иборат. Бу маҳаллий Кенгашлар фаолиятида аниқлик, шаффофлик ва самарадорликни таъминлашга хизмат қилади.

Реестрни қайси орган юритади?

Реестрни шакллантириш ва юритиш бўйича ваколатли орган Ўзбекистон Республикаси Олий Мажлиси Сенати девони ҳисобланади. Ушбу вазифа Сенат девонида Ҳудудий вакиллик органлари фаолиятини ўрганиш маркази томонидан амалга оширилади. Реестр ахборот-коммуникация технологияларидан фойдаланган ҳолда “E-kengash” электрон тизими орқали юритилади.

Реестрдан кимлар фойдаланади?

Электрон тизимдан халқ депутатлари маҳаллий Кенгашлари депутатлари ва маҳаллий Кенгашлар котибиятлари ходимлари электрон рақамли имзо ёки “One ID” орқали фойдаланади. Реестрдаги маълумотлар танишиб чиқиш учун очиқ ҳисобланади. Бироқ давлат сири ёки қонун билан муҳофаза қилинадиган бошқа сирларни ташкил этувчи маълумотлар Реестрга киритилмайди. Реестр давлат тилида юритилади.

Реестрга қандай маълумотлар киритилади?

Реестрга маҳаллий Кенгашлар ваколатларига оид маълумотлар турли соҳалар кесимида киритилади. Жумладан, бюджет, молия ва солиқ сиёсати, ҳудудий дастурларни тасдиқлаш, мансабдор шахсларнинг ҳисоботларини эшитиш, норматив тусдаги қарорлар қабул қилиш, назорат-таҳлил фаолияти, ер муносабатлари, экология, таълим, соғлиқни сақлаш, ижтимоий ҳимоя, меҳнат муносабатлари, коммунал хўжалик, хавфсизлик ва ҳуқуқ-тартибот соҳаларига оид ваколатлар шулар жумласидандир.

Реестрда ҳар бир вазифа ёки функция бўйича нима кўрсатилади?

Ҳар бир вазифа ва функция бўйича унинг қисқача номи, ушбу вазифа ёки функцияни белгилаган норматив-ҳуқуқий ҳужжат номи ва реквизитлари, шунингдек уни амалга ошириш юклатилган маҳаллий Кенгашнинг расмий номи ва даражаси Реестрда акс эттирилади. Бу ҳар бир ваколатнинг ҳуқуқий асосини аниқ кўрсатишга имкон беради.

Маълумотлар Реестрга қандай киритилади?

Вазифа ва функцияни белгиловчи норматив-ҳуқуқий ҳужжат кучга кирган кундан бошлаб 15 иш куни ичида ваколатли орган ахборот тизимида тегишли маълумотларни шакллантиради. Киритилган маълумотлар 3 иш куни ичида тўлиқлиги ва ҳаққонийлиги бўйича текширилади. Агар маълумотлар тўлиқ ва тўғри бўлса, улар тасдиқланади ва ахборот тизимида акс эттирилади. Агар камчиликлар аниқланса, улар бартараф этилиб, маълумот қайта киритилади.

Маълумотларга ўзгартиришлар қандай киритилади?

Агар вазифа ва функцияни белгиловчи норматив-ҳуқуқий ҳужжатга ўзгартириш ёки қўшимчалар киритилса, ёки у бекор қилинса, Реестрга ҳам тегишли ўзгартишлар киритилади. Бунда ваколатли орган ўзгартиришнинг санаси ва моҳиятини қайд этади. Агар вазифа ёки функция бекор қилинса, у Реестрдан бутунлай ўчириб ташланмайди, балки бекор қилингани ҳақида тегишли белги қўйилади.

Ваколатли органнинг ҳуқуқ ва мажбуриятлари

Ваколатли орган маҳаллий давлат ҳокимияти вакиллик органларининг вазифа ва функцияларини таҳлил қилиш, мониторинг юритиш, такрорланувчи ёки аҳамиятини йўқотган вазифаларни аниқлаш ҳамда уларни бекор қилиш бўйича таклифлар тайёрлаш ҳуқуқига эга. Шу билан бирга, у Реестрга маълумотларни ўз вақтида ва тўғри киритилишини, уларнинг текширилишини ва жисмоний ҳамда юридик шахсларнинг ушбу маълумотлардан фойдалана олишини таъминлаши шарт.