Мопед ва скутерларни бошқариш учун ҳайдовчилик гувоҳномаси талаб этила бошлайди, «чиройли» давлат рақами белгиларининг аукцион савдолари тўхтатилади, «Ҳар бир маҳаллада футбол майдони» дастури жорий этилади — 1 октябрдан кучга кирадиган шу ва бошқа қонунчилик ўзгаришлари.

1 октябрдан Ўзбекистон қонунчилигида бир қатор ўзгаришлар ва бошқа янгиликлар кучга киради.

Судьялик лавозимларига номзодлар касбий қайта тайёрлаш курсларида ўқитилади

Президент 21 августда имзолаган фармонга кўра, Ўзбекистонда Судьялар олий мактаби негизида Одил судлов академияси ташкил этилмоқда. Академия судьялик лавозимларига номзодларни ўқитиш, амалдаги судьялар васуд аппарати ходимларининг малакасини ошириш билан шуғулланади.

2025 йил 1 октябрдан бошлаб судьялик лавозимларига номзодлар давлат гранти асосида олти ойлик касбий қайта тайёрлаш курсларида ўқитилади.

Курсларга қабул қилинган шахслар уларнинг эгаллаган лавозими бутун ўқиш даври мобайнида сақланган ҳолда асосий иш жойи бўйича лавозимидан озод қилинади.

Ўқиш даврида тингловчиларга судья ёрдамчисининг 1 ойлик меҳнатига ҳақ тўлаш фонди миқдорида ҳар ойда стипендия тўланади.

Президент ҳузуридаги Давлат бошқаруви академиясида раҳбарлар учун курслар ташкил қилинади

Шавкат Мирзиёев 5 май куни имзолаган фармон билан президент ҳузуридаги Давлат бошқаруви академияси Давлат сиёсати вабошқаруви академияси этиб қайта ташкил этилмоқда.

Академиянинг асосий вазифаларидан бири этиб давлат хизматчиларининг малакасини мунтазам ошириб бориш ва қайта тайёрлаш, шунингдек, бошқарув кадрларини магистратура ваолий таълимдан кейинги таълим босқичларида ўқитиш белгиланди.

2025 йил 1 октябрдан академияда давлат хизматидаги раҳбарлар, раҳбарликка номзодлар ва бошқарув кадрлари малакасини ошириш бўйича қисқа муддатли курслар жорий этилади.

Давлат хизматчиларининг хизмат сафарларини ташкил этиш hrm.argos.uz электрон тизими орқали амалга оширилади

19 июнь куни Шавкат Мирзиёев томонидан имзоланган фармонга кўра, 2025−2026 йилларда давлат фуқаролик хизматини янги ёндашувлар асосида ташкил этишнинг асосий йўналишлари белгиланди.

Хусусан, ҳужжатга кўра, 2025 йил 1 октябрдан давлат хизматчиларининг хорижий ва ички хизмат сафарларини ташкил этиш, ҳисобини юритиш ва таҳлилини олиб бориш hrm.argos.uz электрон тизими таркибидаги «Хизмат сафари» ягона модули орқали амалга оширилади.

Мопед ва скутерларни бошқариш учун ҳайдовчилик гувоҳномаси талаб этилади

Вазирлар Маҳкамасининг 12 апрелдаги қарорига мувофиқ, 1 октябрдан мопед ва скутерларни бошқариш учун ҳайдовчилик гувоҳномаси талаб этила бошлайди.

Хавфсиз ҳаракатланиш учун мопед ва скутер ҳайдовчилари йўл ҳаракати қоидаларини билиши вауларга риоя этиши шарт, шунинг учун Вазирлар Маҳкамасининг 2024 йил 9 августдаги 493-сон қарорига асосан улар малака оширишдан ўтиши ва «А» тоифасидаги ҳайдовчилик гувоҳномасига эга бўлиши шарт.

Ҳукуматнинг 2024 йил 8 июль ва 9 августдаги қарорларига билан 1 мартдан мопед васкутерларга янги талаблар: мажбурий давлат рўйхатидан ўтиш, давлат рақами белгиларини олиш вауларни бошқариш учун «А» тоифали ҳайдовчилик гувоҳномасига эга бўлиш жорий этилиши режалаштирилган эди.

Вазирлар Маҳкамасининг 12 апрелдаги қарори билан ҳайдовчилик гувоҳномаларига оид ушбу муддат яна олти ойга — 1 октябрга кўчирилди. Ҳукумат, шунингдек, эксплуатациядаги мопед ва скутерларни давлат рўйхатидан ўтказиш тартиби тўғрисидаги вақтинчалик низомнинг амал қилиш муддатини 31 сентябргача узайтирди.

Енгил саноат корхоналарига қатор молиявий қўллаб-қувватлаш чоралари қўлланади

Президентнинг 19 сентябрдаги фармони билан, Вазирлар Маҳкамаси ҳузурида Енгил саноатни ривожлантириш агентлиги ташкил этилмоқда.

Агентлик қошида Енгил саноатни қўллаб-қувватлаш жамғармаси ташкил этилади. Агентлик томонидан енгил саноат соҳасидаги корхоналарга 2025 йил 1 октябрдан қатор молиявий қўллаб-қувватлаш чоралари қўлланади.

Хусусан, ташкилот халқаро брендларни жалб қилиш, стандартлаштириш васертификатлашнинг халқаро тизимларини, молиявий ҳисоботларнинг халқаро стандартларини жорий этиш ишлари билан шуғулланади. Шунингдек, экспорт шартномалари бўйича суғурталашни молиялаштириш харажатларини қоплайди ҳамда мутахассисларни ўқитиш учун грантлар ажратади.

«Чиройли» давлат рақами белгиларининг аукцион савдолари тўхтатилади

Вазирлар Маҳкамасининг 4 сентябрдаги қарорига мувофиқ, «Ўзбекистон республика товар-хомашё биржаси» 2025 йил 1 октябрдан бошлаб «чиройли» давлат рақами белгиларининг аукцион савдоларини тўхтатади.

Аукционга қўйилиб, сотилмаган, шунингдек, ишлаб чиқарилиб,сотилмаган харидоргир ҳарф варақамлар комбинациясига эга бўлган давлат рақами белгилари:

1−3-тоифадаги давлат рақами белгилари — Uzavtomotobelgi давлат унитар корхонаси томонидан белгиланган ягона оширилган тўлов эвазига берилади;

4−6-тоифадаги давлат рақами белгилари — харидоргир ҳарф ва рақамлар комбинациясига эга бўлмаган давлат рақами белгиларини беришнинг амалдаги тартибида берилади.

«Ҳар бир маҳаллада футбол майдони» дастури жорий этилади

2025 йил 1 октябрдан бошлаб маҳаллаларда футбол майдонларини барпо этиш бўйича «Ҳар бир маҳаллада футбол майдони» дастури жорий этилади. Бу 21 август куни имзоланган президент қарорида кўзда тутилган.

Дастур доирасида:

• маҳаллалардаги бўш турган давлат мулки объектлари (ер участкалари) уларнинг бир қисмида футбол майдони барпо этиш ва камида 10 йил мобайнида унинг фойдаланиш мақсадини ўзгартирмаслик шарти билан электрон онлайн аукцион савдоларига чиқарилади;
• электрон онлайн аукцион савдолари ғолибларига харид қилинган бўш турган давлат мулки объекти (ер участкаси)нинг қолган қисмидан қонунчиликда белгиланган тартибда фойдаланиш ва тасарруф этиш ҳуқуқи берилади;
• электрон онлайн аукцион савдоларига чиқарилган давлат мулки объектлари (ер участкалари) уч ой давомида сотилмаган тақдирда, уларнинг бошланғич баҳоси босқичма-босқич 10 фоиздан, лекин кўпи билан 50 фоизгача пасайтирилган ҳолда ва сотиб олиш тўловларини уч йилгача бўлиб-бўлиб тўлаш шарти билан савдоларга чиқарилади.

Қимматли қоғозларни сотиш ва фондларни молиялаштиришда инвестиция платформаларидан фойдаланишга рухсат берилади

21 августдаги президент қарорига мувофиқ, 2025 йил 1 октябрдан 2026 йил 1 октябргача инвестиция платформаларидан «Тартибга солиш қумдони» махсус ҳуқуқий режимида қуйидаги йўналишлар бўйича фойдаланишга рухсат берилади:

• қимматли қоғозларни жойлаштириш ва сотиш;
• венчур вапай фондларини молиялаштириш;
• коммандит ширкатларга ҳисса киритиш.

Махсус ҳуқуқий режим доирасида:

• юридик шахс мақомига эга тадбиркорлик субъектлари инвестиция жалб этишни талаб этадиган лойиҳаларини ҳамда улушга эга бўлиш орқали тадбиркорлик фаолиятида иштирок этишга оид таклифларини инвестиция платформаларида жойлаштиришга ҳақли;
• инвесторлар инвестиция платформаларида эълон қилинган инвестиция лойиҳаларини танлаш ва уларга маблағ киритиш орқали инвестиция фаолиятини амалга ошириш ҳамда шу орқали фойда олиш ҳуқуқига эга;
• инвестиция платформалари орқали амалга ошириладиган лойиҳаларни бошқариш инвестиция ва бошқарув компаниялари орқали ҳам амалга оширилиши мумкин.

Давлат идоралари ҳудудларидан мавсумий савдо, умумий овқатланиш ва хизмат кўрсатиш учун фойдаланиш мумкин бўлади

Вазирлар маҳкамасининг 31 июлдаги қарори билан, 2025 йил 1 октябрдан бошлаб умумий овқатланиш, савдо ва хизмат кўрсатиш соҳасидаги тадбиркорлик субъектлари давлат органлари ва ташкилотларига доимий фойдаланишга берилган ер участкаларидан мавсумий фаолиятни амалга ошириш учун фойдаланиши мумкин бўлади.

Бу хиёбонлар, боғлар, сайр жойлари, бульварлар, суғориш ариқлари бўйидаги ҳудудлар, шунингдек, майдонлар, кўчалар, қирғоқбўйи ҳудудлари ва шунга ўхшаш ерларга тегишли. Соғлиқни сақлаш, таълим ва мактабгача таълим ташкилотларига тегишли ер участкалари бундан мустасно.

«Яшил макон» платформасида дарахт экиладиган майдонлар координаталари киритилади

Президентнинг 30 майдаги фармонига мувофиқ, 1 октябрдан бошлаб «Яшил макон» платформасида дарахт экиш мумкин бўлган майдонларнинг координаталари, уларни парвариш қилиш ва тавсия этилган дарахт турлари тўғрисидаги маълумотлар кўрсатилади.

Ушбу ҳужжат билан Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Ўрмон хўжалиги агентлиги негизида Ўрмон ва яшил ҳудудларни кўпайтириш, чўлланишга қарши курашиш агентлиги ташкил этилмоқда.

Янги идора ўрмонларнинг давлат ҳисоби ва ўрмон кадастрини юритади, шунингдек, дарахт ва бута кўчатлари питомникларини кенгайтириш билан шуғулланади.

Пенсияларни нақд шаклда биометрик идентификациялаш ва ЭРИ орқали бериш бошланади

2025 йил 1 октябрдан бошлаб Халқ банкида пенсияларни нақд шаклда беришда Face-ID биометрик идентификация ваэлектрон рақамли имзолардан фойдаланилади. Бу президентнинг 27 майдаги ногиронлиги бўлган шахсларга пенсия ва компенсациялар тайинлашнинг соддалаштирилган тартибини жорий этишга қаратилган қарорида кўзда тутилган.

Тўлов олувчилар тўлов қайдномаларини планшетда электрон шаклда имзолашлари мумкин бўлади. Адлия вазирлиги Пенсия жамғармаси ва Халқ банкининг электрон сўровига кўра биометрик идентификациялаш учун маълумотларни тақдим этади.

Аҳолига нақд пул шаклида бериладиган айрим молиявий ёрдамлар ижтимоий карта орқали ажратилади

Вазирлар Маҳкамасининг 11 март кунги қарори билан Камбағалликни қисқартириш давлат мақсадли жамғармаси фаолиятини ташкил этиш тартиби тасдиқланган эди.

Қарорга кўра, 2025 йилнинг 1 октябридан жамғарма маблағлари ҳисобидан фуқароларга нақд пул шаклида бериладиган маблағлар босқичма-босқич ижтимоий карта орқали тақдим этилади.

Товарларни олиб кириш ва олиб чиқиш «Ягона дарча» божхона ахборот тизими орқали расмийлаштирилади

2025 йил 1 октябрдан товарларни олиб кириш, олиб чиқиш ва транзит олиб ўтиш бўйича барча сертификат, хулоса ва рухсат этиш хусусиятига эга ҳужжатлар фақат «Ягона дарча» божхона ахборот тизими орқали расмийлаштирилади.

Бу 25 март куни президентнинг «Давлат божхона хизмати органларининг фаолиятини ташкил этиш ва божхона маъмуриятчилигини янада такомиллаштиришнинг қўшимча чора-тадбирлари тўғрисида»ги қарорида [ПҚ-122-сон] белгиланган.