Band qilish yo‘lovchi tomonidan telefon, Internet tarmog‘i, elektron pochta orqali yoki boshqa aloqa vositalari bilan tashuvchi yoki uning vakolatli agentiga murojaat qilish orqali amalga oshirilishi mumkin.
Band qilishda avtomatlashtirilgan tizimdan foydalaniladi.

Band qilish muddati tashuvchi tomonidan belgilanadi.
Band qilish chipta rasmiylashtirishning dastlabki bosqichi hisoblanadi.

Band qilingan joy yoki chipta haqida olingan ma’lumotlarni tashuvchi yoki uning vakolatli agenti tomonidan boshqa shaxslarga berilishiga yo‘l qo‘yilmaydi, qonunchilik hujjatlarida nazarda tutilgan hollar bundan mustasno.
Band qilishda yo‘lovchi tashish uchun to‘lovni belgilangan muddatda amalga oshirmasa yoki tashuvchi tomonidan belgilangan qoidalarda nazarda tutilgan boshqa shartlarni bajarmagan hollarda, tashuvchi yoki uning vakolatli agenti yo‘lovchini ogohlantirmasdan band qilishni bekor qilishi mumkin.
Yo‘lovchi band qilingan joyga, tashuvchini oldindan xabardor qilmay qatnovga etib kelmasa, tashuvchi tashish yo‘nalishining keyingi uchastkalarida band qilishni bekor qilish huquqiga ega va yo‘lovchidan tashishdan voz kechganligini hamda o‘z vaqtida xabar bermagani uchun belgilangan tartibda yig‘im undiriladi.

Agar yo‘lovchi tashuvchi bilan belgilangan muddatgacha band qilingan joyni bekor qilish to‘g‘risida tashuvchini xabardor qilgan bo‘lsa, unda tashuvchi bilan yo‘lovchining o‘zaro kelishuviga asosan, tashish yo‘nalishining keyingi uchastkalarida tasdiqlangan band qilish bekor qilinmaydi.
Tashuvchining aybi bilan yo‘lovchi band qilishni bekor qila olmagan yoki ro‘yxatga olish joyiga etib kela olmagan bo‘lsa, yo‘lovchidan yig‘im undirilmaydi.
Sog‘ligi yomonlashganligi sababli, yo‘lovchi band qilingan joydan voz kechmagan bo‘lsa yoki ro‘yxatga olish joyiga etib kelmagan bo‘lsa, bu holat tibbiy ma’lumotnoma bilan tasdiqlanganda, yo‘lovchidan yig‘im undirilmaydi.
Band qilingan joylarga yo‘lovchilarning qatnovga kelmaslik hollarini inobatga olib va bunday hollarda tashuvchi o‘zining tijorat yo‘qotishini kamaytirish maqsadida yo‘lovchilarni havo kemasida mavjud bo‘lgan miqdordan ortiq joyni band qilishi mumkin. Bunda qatnovga kelgan yo‘lovchilar belgilangan miqdordan oshgan taqdirda tashuvchi qolgan yo‘lovchilarni ro‘yxatdan o‘tkazmasligi mumkin va buning uchun ushbu yo‘lovchilarga belgilangan tartibda kompensatsiya xizmatlarini ko‘rsatishi hamda ularni navbatdagi qatnovga yoki boshqa tashuvchining qatnoviga joyni band qilish orqali tashishni ta’minlashi lozim. Tashuvchi bu haqda chipta rasmiylashtirish jarayonida yo‘lovchilarni oldindan ogohlantirgan bo‘lishi lozim.

Tashuvchi o‘z qoidalarida quyidagi toifalar uchun band qilishning alohida shartlarini o‘rnatishi mumkin:
2 yoshgacha bo‘lgan bolalarni tashishda;
2 yoshdan 12 yoshgacha bo‘lgan bolalarni tashishda;
ota-onalari, vasiylari yoki homiylari hamrohligisiz uchayotgan bolalarni tashishda;
zambildagi kasal yo‘lovchilarni tashishda;
tashish uchun salonda qo‘shimcha joy talab qiladigan yo‘lovchilarni tashishda;
imkoniyatlari cheklangan yo‘lovchilarni, shu jumladan o‘rindiq-aravachada tashiladiganlarni tashishda;
qurol va o‘q-doriga ega bo‘lgan yo‘lovchilarni tashishda;
tashuvchi tomonidan bepul tashishga ruxsat etilgan belgilangan me’yordan oshgan bagajni tashishda;
yig‘ilgan ko‘rinishda uch o‘lchov yig‘indisi bo‘yicha hajmi 200 sm dan oshgan bagajni, shu jumladan turli xil sport anjomlarini tashishda;
faqat havo kemasi salonining qo‘shimcha o‘rindig‘ida tashilishi mumkin bo‘lgan bagajni tashishda;
hayvonlar yoki qushlarni tashishda.